Jemi të emocionuar të njoftojmë përfundimin me sukses të një kapitulli tjetër të Programit të Kompanisë së Nxënësve, me GEN-E Festivalet Rajonale të Sipërmarrjes. Këto aktivitete të shumëpritura u zhvilluan në qytetet e Korçës, Lezhës dhe Gjirokastrës përgjatë muajve prill dhe maj 2023 të mbështetura nga bashkitë e këtyre qyteteve.Me shumë entuziazëm dhe vendosmëri, në këto festivale morën pjesë 287 nxënës që përfaqësonin 39 shkolla të mesme nga të gjitha anët e Shqipërisë.

Objektivi kryesor i Kompanive të Nxënësve ishte të shfaqnin produktet e tyre unike dhe idetë inovative për një audiencë më të gjerë.Të rinjtë patën mundësinë të promovojnë dhe të shesin produktet e idetë e tyre para një game të ndryshme vizitorësh. Festivalet tërhoqën një numër të konsiderueshëm pjesëmarrësish, duke përfshirë qytetarët vendas, profesionistët e biznesit dhe mediat, të cilët shfaqën interes të lartë për të parë këto iniciativa të këtyre sipërmarrësve të rinj.

Ndërsa mbyllim këtë kapitull të Programit të Kompanisë së Nxënësve, ne presim rritjen dhe suksesin e vazhdueshëm të këtyre sipërmarrësve aspirues.